自從母親大人隻手做完手術後!我要做埋好多家中事務,都無時間做蛋糕住!
近來手痕得好緊要!個口同個胃都好痕!咁點算呢!
好在個日在blog度兩頭遊時,忽然見度有個blog友話可以攪爛d提子加d檸檬汁可以自制雪條!
都唔錯喎!咁我就自已亂咁試喇!
因為個blog友只係講做法,係無份量!
所以我只係量過我個雪條模要幾多重量的液體!
咁 ~~~我就有斷估無痛苦咁亂來喇!
出來成品唔錯!我都幾滿意!好好味~~
做法簡單又健康!
好正啊!!!
材料份量 :
紅提子(原本只係用任何提子,無落藍莓)
藍莓(家中用剩,順手放埋落去)
檸檬汁(隨意,我用左大半個)
*個模用320g液體,咁即係提子加藍莓肉要超過這個份量!
我用左兩樣加埋超過450g!出來啱啱好!
做法 :
(一)生果洗淨吹乾,提子不需去皮及核
(二)同放食物處理器攪爛後加檸檬汁
我無加糖,因為父親大人有糖尿病,這樣做都夠甜!因為d提子都好甜
如果各位試味後覺得唔夠味.可減檸檬汁份量同加蜜糖!
加蜜糖比加砂糖健康,舊年試過做石榴味沙冰改加蜜糖効果都不錯啊!
(三)然後隔渣!剩下的汁液倒入模放冰格即成!
出來樣子不錯!酸酸甜甜的好醒胃啊!
雪好後起模,用焗蛋糕的腊紙或牛油紙每條包好放在密實盒!
再放回冰格,可方便家中各成員隨時食用!
沒有留言:
張貼留言